Report about Siget - September 21 1566 (in German)

Győri tábor, 1566. sept. 21.

Emperor Maximilian sends a report to Ágost, a Saxon elector, about the siege of Sziget, Zrínyi and the castle, as well as informing him of Gyula.

Maximilian der annder von Gottes genaden erweiter romischer kayser zu allen zeitten merer des reichs.
Hochgebornner lieber öhaim, unnd churfürst.



Nachdem dein lieb aus vnnserm negstvorigen iren gethonen schreiben den weittern fürgang vnnsers jeczigen kriegswesens wider den erbfeind, wie es damit hie disset vnnd eenhalb der Thonaw beschaffen, vnnd darneben auch verstannden, wie küenhafft vnnd ritterlich sich weilend der teüre graf von Serin, vnnser gewesner obrister im Zigeth, daselbsten gegen dem türggen zu wehr gestelt, vnnd ain zeit lanng dapffern unnd manlichen widerstandt ihme gelaistet, also das wir inn gueter hoffnung zu Gott gewesen, es solte der veindt, auch mit aller seiner macht, solchen ortts, sein willen nit vollenden, sonnder entlich vngeschaffter dingen dauon wider ablassen müessen, so hat es doch seithero, nach dem willen vnnd verhengnus Gottes, ainen anndern vnnd gleichwol beschwerlichen vnd vast betaurlichen ausganng erraicht, dergestallt, das vnangesehen aller vnnser statlichen fürsehung, so wir daselbsthin, nach des grauen selbst willen, dermassen geordnet, das wir unns kaines anndern, als steiffer erhaltung (wie auch der graf selbst geboffet) vnnd das sich auf ein lannge zeit erhalten künden, vnnd sonnst diser placz von natur herumbligenden gemösigen, sümpffigen vnnd vast wässerigen art also geschaffen, das wo nicht ein so stäte haisse vnnd dürre nun eben lanng gewehrte Witterung, dergleichen in villen jaren nit beschehen, angefallen, sich auch auff dasselbe negst Gott nit wenig zuuerlassen gewest, dannocht der türckhisch kaiser durch die merckhliche grosse menig seines kriegsvolckhs vnnd die stäte vnaufhörliche harr, vnnd sonnderlich auch durch die new inuention vber klain vnnd grosse Wassergräben zustürmen leczlich souill ausgericht, das auff den sibennden tag gegenwürttigs monats durch sein kriegsvolckh vnnd mit dem funfczehennden stürm ermelt vnnser schloss Zigeth erobert, alles was darinn betretten wie auch der graf selbst jämmerlich vmbgebracht, vnnd also diser nambhafft veste placz, an dem vnns, so woll auch vnnserm freündlichen lieben brueder vnnd fürsten erczherczog Karlen zu Österreich etc. auch vnser baider gehorsamen, christlichen lannden vnnd fürstenthumben nit wenig gelegen, in sein des erbfeindts tyrrannische hannd vnnd gewalt khommen, inmassen aus der herczugethonen verczaichnus, (1. L. a Második r. 1566. sept. 21. datuma alatt.) wie sich solches verloffen, mer in specie etwas weitter zuuernemmen.

Nun wären wir gleichbald nach vnnserm anczug ins veldt nichti merers begirig gewest, als zu rettung angeregter vestung Zigeth vnns mit vnnserm völligen kriegshör daselbsthin zu wennden vnnd den veindt von dannen mit Gottes hilff vnnd dapffern entsaczung abczutreiben, dennach aber solches aus villen mercklichen grossen vngelegennhaitten, zuuorab der ferrne des Weegs, vnd das wir mit vnnserm statlichen geraisigen zeüg, auch dem groben geschücz durch etliche gar ennge päss vnnd rauhe wildnüssen mit sonnderer gefahr vnnd vngemach durchziehen müssen, vnnd darczu dess am aller beschwerlichisten den Thonawstraamen verlassen hetten müessen, daheer zumall vnmöglich gewest wäre in solchem ziehen vnnsere heüffen zu ross vnnd fuess mit der prophiant nur zu eüsserister

geringer notturfft zuuersehen vnnd dieselb hernach zubringen, so haben wir riit vnnderlassen auf das annder mitl der berürtten entseczung zugedenckhen, als nemblich auf ain gegen belegerung ainer vom feindt innhabennden vestung fürczunemen, welches wir dann, wo vnnd wie es fruchtbarlich fortzustellen vnnd ins werckh zurichten, in dem negst hieuorigen vnserm veldleger in statliche berathschlagung geczogen, vnnd ob wol daruntter allerhand schwäre difficultetten in mer weeg vorgefallen unnd sonnderlich bedacht worden, obs auch nucz, räthlich vnnd sicher mit dem hellen hauffen die ganncz herobige gränicz sambt der landtschafften, also weit vnnd ploss zu hinderlassen, darumben dann auch destoweniger fürgeeylet werden mögen, so haben wir vnns doch entlich dahin resoluiert aus vnnserm negstgehaltnem veldleger mit ehistem aufczuziehen, hinab zu dem annderm vnnserm bey Kommorn im veldt gehabten kriegsvolckh zu coniungiern vnnd alsdann gestrackhs in dem namen des Allmechtigen auf die armenier vnnd anndere türggen, so bey Stuelweissenburg damaln zu veldt lagen, zuuerruckhen, dieselben mit Gottes genedigen hilff zuschlagen, vnnd darauf gleich alsbald für Gran zuziehen dasselbe zubelegern, vnnd vnns mit allem eüsseristen ernnst zubearbeitten solche vestung aus der veinde zu vnsern hannden widerumb zu recuperiern vnnd zuerobern.

Alls wir aber mit disem vnnserm resoluierten christlichen fürnemen gleich im werckh stuenden dasselb also mit göttlicher hülff fortzuseczen, siehe, so khombt vnns gleich die obangedeütte widerwerttige kundtschaft ein mit dem beschwärlichen Verlust vnnsers schloss Zigets, vnnd des mer, das sich der türckhisch kayser darauf gennczlich entschlossen hette mit dem ehisten von dannen auszubrechen vnnd seinen gewaltigen zuge den negsten auff vnnser alhieige befestigte statt Raab strackhs zurichten, vnns also zu hinderziehen, vnnd darneben sich mit höchstem gewalt vmb die eroberung solcher vnnser vesstung auch anczunemmen. Wann sich nun solche kundschaft angeregts des veindts vorhaben halb von allen ortten bald continuirt, also das wir demselben glauben zuseczen wol vrsach gehabt, so ist daraus nothwenndigclich erfolgt, das wir auch vorangeregt vnser fürnemmen auf die türggen von Weissenburg vnnd dann auch auff Gran zuruckhen enndern raüessen.

Dann was nit allain vnns, sonnder der ganczen teütschen nation an erhaltung dises placzes Raab gelegen, das ist aus dem leicht abczunemmen, wo es der allmechtig Gott nach seinem gerechten zorn also, wie wir doch nicht hoffen wollen, zu straff der Sünden verhienngte, das diser pluetsüchtig vnnd schwer vheind solches alhieigen placzes, dessen die ewige allmechtigkhait Gottes genedigclich verhüetten wolt, mächtig werden solte, das er dardurch von stundan den Thonawstramen, welches doch zu jeden vnnsern kriegs vnnd anndern notturfften vnnd trefflichen bequemblichaitten in krieg vnnd fridennszeitten ain gewüntschtes klainot für vnns vnnd die ganncze christennhait ist, zu seinem merckhlichen grossen vortl einbekhommen; dessgleichen vnnserm ansehenlichen vesten schloss Commorn, des doch neben Raab nunmalls wol fürtreffliche schlüssel gannczes teütsches lanndes zuhalten, baldt vberlegen sein vnnd darczu die fruchtbare, schöne vnnd nuczliche, auch zu allen christlichen kriegsübungen dieser ortten wider den erbfeindt wol gelegne innsei vnnd lanndtschaft die Schüth seinem viechischen, türckhischen gewalt vnnderwerffen möchte, alles zu solchem vnnserm vnnd gemainer christennhait abbruch, schmelerung vnnd verderben, das gleich alsbald vnnser statt Wienn daheerwerts das leczte confin (des der liebe Gott verhüette) werden müeste.

Hierauf vnnd dem allem nach haben wir sambt vnserm freundlichen lieben bruedern vnnd fürssten, erczherczog Ferdinannden zu Österreich, sambt vnnsern gehaimen reichs vnnd anndern vnnsern kriegsräthen vnnd obristen kriegsbeuelchhabern annderst nicht im rath befinden mögen, als zu zeitlicher fürkombung jeczterczelten Übels, vnhails vnnd vnndergangs alle Sachen dahin zurichten, damit diser nucz vnnd veste placz Raab mit der hilff Gottes vertaidingt dem veindt vnseümblich vorgebogen, sein tyrrannisch fürnemmen gebrochen vnnd es zu seiner daheerkonfft gleich im nammen Gottes mit ime mit der faust darauf geseczt wurde.

Aus diser vnnd kainer anndern vrsach haben wir vrins negstverschinnes sambstags Exaltationis Crucis heüt acht tag verschinnen mit wolermeltem vnserm lieben brueder vnnd anndern vnnsern fiirsten teütschen vnnd wällischen, so jeczt bey vnns im veldt sambt vnserm kriegsvolckh zu ross vnnd fuess, souill wir dessen damals bey vnns gehabt, aus vnnserm negstgehaltnem veldleger erhebt hieheer begeben vnnd vnns nicht in den fortl zwischen die Wässer, sonnder in das freye veldt gelegert.

Es seyen auch gleich darauf gevolgten sonntags negst verschinnen die vorgemelten vnnsere reütter vnnd knecht von allen nationen, so ein zeit lanng bey Commorn zu veldt gelegen, als nemblich sechs vnnd zwainczig fahnen teütscher gerüster pferdt, vierdczehen fahnen hussärn, sambt dreyen regiment knechten, auch vnserm besöldten italianischen fuessvolckh, sambt den Sophoyischen schüczen pferden in gueter Ordnung bey vnns allhie ankhommen.

Wann sich dann nun die vorgemelte kundtschaften, das es bey dem laidigen erbfeinde noch die mainung haben solle, seinen ferrnern zug gerichts daheer zunemmen, also bestenndigclich verfolgen vnnd continuirn thuet, so seyen wir in vnnserm entschlossnem kayserlichen gemüet dahin genczlich gesinnet, das wir mit disem vnsern völligen christlichen kriegshöhr in dem namen des Allerhöchsten, sein des vilbemelten, vnnsers vnnd gemainer christennhait erbfeindts hie auff diesem placz erwartten, vnnd es mit ime annemmen, auch dapffer vnnd vnerschrockhen darauf seczen wollen, wie. er es bey vnns suechen würdet, oder aber, wie wir die gelegenhait sonnsten gegen ime ersehen werden.

Inmassen wir dann alle vnnsere Sachen gegen Gott dem allmechtigen, vnnd sonnsten alle vbrige beraitschafft dahin gerichtet, disem also mit freyem küenen gemüet vnnd herczen, auch mit gueter Ordnung, bedachtigkait vnnd zeitigem rath nach dem willen des Allmechtigen vnnd in seinem göttlichen namen würckhlich nachzuseczen.

Der getrösten zuuersicht sein göttliche allmacht solle vnns zu dempffung vnnd niderdruckhung des erbfeindts gefasten stolcz vnnd muets zubefürderung seiner ehr, glori vnnd göttlichen namens, auch gemainer der christennhait haill vnnd vvolfart glückh, sig vnnd gnad wider disen vnaufhörlichen lesterer, verspotter vnnd Verfolger seines heiligen namens mildigclich zu gönnen vnnd zuuerleihen, vnnd solche gaisel vnnd ruetten ainmaln ins feür zuwerffen genedigclich geruechten.

Vnnd im fall aber nun er der türckh yeczo, nach vernemmung vnnser vnnd vnnsers Gott lob statlichen kriegshöhrs daheerkonnfft vnnd gethonen legerung, angeregts sein gewisslich gehabt vorhaben verkheren vnnd auf vnns nicht gestrackh fortziehen wurde, so wollen wir alsdann weitter dasjenig fürnemmen, das wir mit guetem rath vnnd bedacht für das nuczist, wegist vnnd beste erkennen werden, zu dem allem verleihe der güetig Gott sein reiche gnad vnnd milden segen.

Beschliesslich wollen wir deiner lieb gleichwol nit on sondere beschwerung vnuerhalten lassen, das kurczverruckhter tagen vnnser befestigter placz Jula, über alle vnnsere guete fürsehung, durch verczagte verwarlosung vnnd clainmüetigkait des alda gewesten obersten, deren sich zwaar bey ime niemands vermuettet, auch in des erbfeindts hennde kommen, vnangesehen, das solcher orth mit profiannt, geschücz, munition vnnd darczu statlicher besaczung von teütschen vnnd hungerischen kriegsvolckh alles biss zum vberflus auffs beste versorget vnnd versehen gewest ist; wie sich aber solches zugetragen, vnnd was abermals die türckhische pluethunde für ain vnmenschliche wüetigkhait an vnnserm abcziehennden kriegsvolckh tyrrannischer, viechischer weise (dessen sy sich gleichwol zuuor versehen sollen) geübet, das ist mit kurcz ab der anndern herczuegethonen verczaichnus zuuernemmen.

Desto mehr seyen wir zu vnnserm güetigen, allmechtigen Gott der starckhen zuuersicht vnnd hoffnung, es solle sein göttliche allmechtigkhait alle dise vnnd vill andere mer tyrrannische, vnmenschliche, erbärmliche thatten vngerochen nit lassen, vnnd vnns vnnd gemainer christenhait diser baider Verlusten annderwerts genedigclich ergeczen.

Das alles guet vnnd böss, wie es ist, vnnd vom lieben Gott also verhennget wirdt, wolten wir deiner lieb zu continuation vnnserer bericht von dieser vnnser christlichen expedition wolmainlich zuerinndern nicht vnnderlassen, damit dein ieb desto mehr vrsach habe ire vnnderthonen vnnd angehörige vmb versönung des gerechten göttlichen zorns zur puess vnnd besserung, auch treibung des innigclichen gemainen gepets gegen ime vnserm lieben herrn Gott, Hailand vnnd Säligmacher weisen vnnd anhalten zulassen.

Vnnd wir seyen dein lieb mit aller freündtschafft vnnd besonndern kayserlichen gnaden vorder wol geWegen. Geben in vnnserm kayserlichen veldtleger bey Raab, am tag des heiligen zwölf pothen Mathäi apostoli den ain vnnd zwainczigisten tag des monats Septembris anno etc. im sechsvnndsechczigisten, vnnserer reiche des romischen vnnd des hungerischen im vierdten, vnnd des behemischen im achzehennden.

Maximilian m. pr.
L. Kirchlager m. pr.

Külczim: Dem hochgebornnen Augusto herczogen zu Sachssen, lanndtgrauen in Düringen vnnd marggrauen zu Meissen, des heilligen römischen reichs erczmarschalchen, vnnserm lieben öhaim vnd churfürsten.

Eredetije a drezdai állami fő-lltárban, Maximiiiani 11. und churfürst Augusti zu Sachsen gewechselte schrifften den hung, krieg etc. belangend, anno 1566—67. loc. 9,323. blatt 155—160.